Phili 4 | BJR | STEP | Óo qiní qíkaqaafasaa Firipi máqannaasa firaaqóo ínniara qiní qímuqusifaqa ínniara daunduránnoo óonu máfi íridaqa ínniara dídidanoo. Ínnee firaaqóo asasírana qími maríasa máriafaqa ínnee qiní moodáa fidíkara foora márida qiní asasírana qímimaríafanoo. Minára ínni qímannimidaqa Yísufa innaarúnaindari qúmuaninnanara asasammásee áfeesida máriaqeera fáasai qímannimiqa ínni márifa miqímandee karaambáiqaki mapukúsee máriaqa.

Philippians 4

Pauroofa ámiqira oosanara naamúaqidanoo.

1 Óo qiní qíkaqaafasaa Firipi máqannaasa firaaqóo ínniara qiní qímuqusifaqa ínniara daunduránnoo óonu máfi íridaqa ínniara dídidanoo. Ínnee firaaqóo asasírana qími maríasa máriafaqa ínnee qiní moodáa fidíkara foora márida qiní asasírana qímimaríafanoo. Minára ínni qímannimidaqa Yísufa innaarúnaindari qúmuaninnanara asasammásee áfeesida máriaqeera fáasai qímannimiqa ínni márifa miqímandee karaambáiqaki mapukúsee máriaqa.

2 Óo ánaaseeqara Eeuoodiasa námmarifa faqa Sindikeesa námmarifa faqa ínneeqara maqee maqee rairaiqírana minníseeqa aneenná áunannaasandíriara foora máridaqara karaambáiqaki ámiqi ámiqimasee moodáanaki máriaqa. 3 Óo qiní Firipi máqannaa qifaaqasáa qíqoondi moodáanaki qiní qifaaqasáa aináini maríanafa aní faqa qímamidaqa anée mi-anaaseeqandá andeeqásaifaqa moodáanaki máriaqeera. Miqandá óoqai Yísuna fasáasa ufa maqúsa maqusa nídaqa qiní dadaaqídaqa qímannimi marúqanda máridaqarámmia anée miqandá andeeqánnisaa. Miqandá faqa Kareemeendána faqa aiqámausa qiní faqa moodáanaki aináinímariasa faqa misáuqa aiqámausa núqu Ánutuna náaru máriranaki fímariana búkaki misáuqa núqu máridanoo.

4 Ínnee Karaambáiqaki márianara maqee maqee asasída kai máriaqa, kafáa qímannimidaqa, asasiaqa.

5 Ínnee aiqámausa sía ramoo rámaaiaqa íreedá kai nírana márirana aiqámausa nímiaqa. Karaambáiqa qúsasaa qúmuannoómmi. 6 Ínneeqa óosana óosana sárauqira ainainara sía óonumafi írifanoo nímuqusiani, ínnee Ánutunara innaaru qídaqa miqóo kai ínneeqa sárauqi maría óosana óosana ainainara innaaruqiaqa. Innaaru qídaqa Ánutunara dúfi dúfi qírana námufaqa innaaru qiaqa. 7 Ínnee miqífanoo Ánutuna aundurá asooárafa firaa ainaina tiá máridanoo faiqí faiqi írirafa sía miná amana máridanoo, mi-asooaráfa ínni nímuqusa faqa írirana faqa ásauku mundírana Yísunakina máriafanoo miqóo ínni rakísinnimaqaannoo.

8 Óo qiní qíkaqaafasaauqa qiní taikára ufa maaqímminoo máridanoo, ínni íriranara qímannimidaqa, ínnee ínneeqá kai ámiqira ainainara írirafa faqa úriqarara ainaina faiqí amooqímaria ainainnara írirafa faqa mináuqara kai maqee maqee náaqoo nitikúraki ínni írirafa qumbiqáani. Kúqaa qímaria ufana faqa náaquqara amiqira ainaina faqa andeeqárana faqa ánukara ainaina irirana faqa idaaqíra ainainara irirana faqa ámiqira oosana ainaina Ánutufa amaná íriaqaa íra ainaina faqa mi-ainaináusara kai nitikúraki qumbiqánoo máriani. 9 Ínnee qiní Pauroosasáaqaraa ámiqira oosana qáfeeusa máriafanoo mináuqa maqee maqee qinée íafanandée kai iaqa. Qiní ufakínaana faqa qinée íafanandee ínafa mi-maú kai fímarifanoo Ánutufa naundurá asooárana nímimarifa ínni faqa núani.

Pauroofa Firipi máqannaasa munnimma ámunara dúfi dúfi qídanoo.

10 Qinée Pauroosa karaambáiqaki fídaqa maqee maqee firaaqóo ínniara óonumafi íridaqa asisída máridaqa. Ínnee Firipi máqusanaasa óoqai nárana feefauríra munnimma dadaaqíqa qímiqau. Dóo miqóo kísaaqasaa marikíqa dóo maqée kafáa qiníara íridaqa dadaaqí maríafanoo. Ínnee sía qiníara káaqa aunúsee mána mána ímariafaqa minára qídaqa ínneeqa maqúsaindari níanaindari dadaaqírana sía amana máree ánimariafaqa minára ínnee sía qiní dadaaqúsa máriaasa maqee kaifáa dadaaqímariafanoo. 11 Sía qinée qeeqá daunduráki ínniara minníqiseeaafoo qímasee ikíraqaidaqa, qeeqá márunnanaki márunnanara dóo márida fee qímasee qifaaqa quqáidaqa dóo mi-ainainnára akoofásaikammidaqa. 12 Qinée sárauqiranaki márunnanara dóo akoofásaikammiqa máridaqa, rairaá írinaki márunnanara faqa akoofásaikammiqa máridaqa. Qinée mi-oosanná íridaqa dóo írimarunausa máridaqa, qinée yái yái fee yáqoo aukuanee qímuaqu qumbiqánoo fee máridanoo fee dáararee máridee, rairaá íranaki fee máridee sárauqiranaki fee máridee mi-aiqama ainaináusaki máridaqa sía múnari mínari ídaqa dóo qifaaqa quqásee máriranara akoofásaikammiqa máridaqa. 13 Ásauku mundírafa narí afeeka qímufaqa minánnai ámiqiranee mandáikiranee káqi máraidaqa.

14 Ínnee Firipi máqannaasa qiní dadaaqianára dúfi dúfi qídaqa. 15 Óoqai indaarú ínni maqa máaqa Maseedoonia minnísee ámiqira fasaasa ufa maqúsa maqusa qímannimiqa níniufaqa ínnee Firipi máqannaa Yísuna ufara suqímarusa kai sía moo máqannaasa ínneeqá kai dadaaqíusa máriafanoo. Ínneeqá kai nárana munnimma qímufaqa minánnai qeeqá nárana aina maraséeqa námasaida aináiniqiafana. 16 Qinée Teesaroonika máqusai máriafanaqa ínnee moómoo kari qinée mandáinainaki máriafanaqa ínnee dadaaqídaqa nárana máree maría munnimmana qímaqee máriqau. 17 Qinée sía nárana máree maría munnimma moó faqa moó faqa máraanauree qídaqa maa-ufána qímannimidaqa, qinée ínni núquara afeedíra ainaina innaarúnai nímaqaanífee qídaqa maaqóo munnimma qímianara qídaqa. 18 Eepafarooditusafa ínni maqúsaindari ínni máqannaafa maqee qúnnanara ínneeqa nárana máree maría munnimmana minásaa soofanoo míni qímifaqa dóo aiqáma máraunnanara ínni qímannimidaqa dóo qiní qimana kái máridanoo fíqaramásee faqa máridanoo. Mi-munnimmána qímaqaafa tatúfira aandau Ánutuna suqá ámi maríafára foora ámiqira áfunda aikiambú ímarifara foora Ánutufa asasammásee máree marí ainainna máridanoo.

19 Sía meerái kai ínni afeedammá nímaqaannoo maaqóo faqa ínnee sárauqi maría ainainna ínni nimana kái nímiannoo, narí innaarúnai mári qúmiasana moómoo márina narí ásauku mundírana Yísunaki márina ínnee sárauqi maría narana ainainna ínni nimana kái nímiannoo. 20 Maasá Ánutufa maasá qíkoofa miná amooqírafa náaru náaru máriani. Kúqaa.

Pauroofa nímandaidanoo.

21 Ánutuna faiqi námu miná ufa írimariasa ásauku mundírana Yísunaindi máriasa Firipi máqannaasa ínni aiqámausa nímandaidaqa. Yísuna ufa íri maría qikaqaafasaasa qiní faqa máriasa ínni nímandaidaqa. 22 Maaqóo Ánutuna ufa írimariasa aiqámausa ínni Firipi máqannaasa nímandaidaqa, Roomma máqannaasa úriqarara fasiqa Sisaana máaqaki aináinímariasa misákiqari akaqáusa Yísuna ufa írimariasa misá faqa ínni firaaqóo nímandaidaqa. 23 Ásauku mundírana Yísuna maasá karaambáiqa áfaarirafa ínniki aiqámausaki máriani.